पाल्पाका गाउँमा डुल्ने नरिसंह सहरका पर्दामा

यज्ञमूर्ति तिमिल्सिना/पाल्पा

गाउँमा धेरैले एउटा खुट्टा नभएको मान्छे आयो भनेर कानेखुशी गर्थे तर अहिले मेरो बारेमा बृत्तचित्र बनेपछि मलाई मात्र होइन सबैमा खुशीयाली छाएको छ पाल्पा दोभान वडा नं३ का नरिसंह भण्डारीले सञ्चारकर्मीसित भने ।

गाउँमै बसी खेतीकिसानी गर्दै आएका नरिसंहकौ साहसै साहस र शन्देसले भरिएको यथार्थ जीवनमा आधारित नरिसंह नामक वृत्तचित्र तयार भएपछि उनीमा आत्मविश्वास समेत बढेको छ । अपाङ्गगता भएरपनि साङ्गलाई चुनौती दिने नरिसंह भण्डारीमगरको यथार्थ जीवनमा आधारित यो वृत्तचित्रको निकट भविष्यमै तानसेनको सन्तोष चलचित्रको हलमा पर्दशन हुँदैछ ।

अनाथ बालबालिकाहरुको सहयोगार्थ उक्त च्यारिटी शो गर्न लागिएको हो । दोभान ३ घोडेबास पाल्पाका नरिसंह भण्डारीमगर एउटा खुट्टा नभएर पनि अन्य सामान्य मानिस सरह दैनिक जीवन यापन गर्दै आएका छन् । वृत्तचित्रका प्रमुख पात्र मगर ४ वर्षको छदा गुल्मी जिल्लाको कन्यामभिरबाट लडेर घाईते भएका थिए । घास काट्न गएकी दिदीको पछि लाग्दा भीरबाट खसेर भाचिएको वायाँ खुट्टाले समयमै उपचार नपाएपछि काम्रोले बाधिराखेको १५ दिनपछि घुंडाभन्दा तलको भाग कुहिएर झरेको उनले बताए । ४८ वर्षका मगरले एउटै खुट्टाको भरमा सजिलै रुखमा चढेर घास दाउरा गर्छन् हलो जोत्छन् धान झाट्छन् गारो लगाउछन् खोला तर्छन र मजाले एउटै खुट्टाले छमछमी नाच्छन् पनि । यो कुरा सुन्नेले विश्वास गर्दैनन् तर देख्ने सवैले हो रैछ भन्दै उनको साहस र लगनसिलताको सम्मान गर्छन् ।

वि।संं।२०४० सालमा गुल्मीबाट पाल्पाको दोभानमा बसाई सरेका मगरले घरबाट छुट्टिदा एक माना चामल मात्र अंश पाएको स्मरण गर्छन् । एउटा खुट्टाकै भरमा गरेको मेहनतबाट उनले प्रशस्त खेत र धन सम्पत्ति जोडेका छन् । शूरुका दिनहरु दुखद कष्टपूर्ण र अत्यन्त मार्मिक रहेपनि आफ्नो मेहनत लगन र आत्मविश्वासका कारण जीवन यापन सहज बन्दै गएको उनी बताउछन् । तीन छोरा दुई छोरी र एक श्रीमती सहित ७ जनाको परिवारमा उनकी श्रीमती पनि बोल्न सक्दिनन् ।

नरिसंहको यो साहसिक जीवनशैलिबाट प्रभावित साहित्यकार तथा उदयीमान स्रष्टा दल बहादुर गुरुङ्गले नरिसंहको यथार्थ जीवनमा आधारित वृत्तचित्र बनाउने आट गरेका हुन । लेखक तथा परिकल्पनाकार गुरुङ्गले भने झै नरिसंह साच्चिकै मरुभूमिमा फूल्न लागेका फूल नै हुन । जसबाट स्वार्थी समाज र मेहनत नगरि सुकुम्बासी बन्ने मान्छेहरुका लागि प्रशस्त शन्देसहरु छन् । श्रीनगर फिल्मस प्रालिले तयार गरेको यो वृत्तचित्रमा मनिष पन्थको छायांकन तथा निर्देशन रहेको छ । करिव आठ महिना लगाएर निमार्ण गरिएको नरिसंह नामक यथार्थ जीवनमा आधारित वृत्तचित्रको लगानी डेड लाख रहेको छ ।

यस अघि बुटवलमा देखाईएको यो वृत्तचित्र प्रदर्शनको लागि गुल्मी र पोखरा लगायतका स्थानहरुबाट माग भैसकेको र गुरुकुलमा समेत प्रदर्शन गर्ने पहल भैरहेको लेखक दल बहादुर गुरुङ्गले जानकारी दिए । साहस तथा आत्मविश्वासकै कारण आफु यो स्थानमा आईपुगेको बताउने मगरको वृत्तचित्रबाट आफु जस्तै धेरै अपाङ्गता भएकाहरुको लागि र अन्यको लागि पनि थप उर्जा थप्नमा सहयोग पुग्ने विश्वास छ ।

अपांगता सरोकारमा थप सामग्री