चरकमा पनि डायलाइसिस सेवा सुरु

पोखरा, १ मंसिर (दैनिकी)

पोखरास्थित चरक हस्पिटल एण्ड रिसर्च सेण्टर प्रालिले आजदेखि डायलाइसिस सेवा सुरु गरेको छ । डायलाइसिस एक आधुनिक प्रविधि हो जसले मृगौला रोगीहरुको रगत शुद्धिकरण वा शरीरमा बढी भएको पानीको मात्रा निकालिन्छ । पोखरामा मणिपाल शिक्षण अस्पतालपछि यस अस्पतालमा मात्र यो सेवा सुरु भएको आज आयोजित पत्रकार सम्मेलनमा जानकारी दिइयो ।
दुईवटा मेसिनको साथमा हेमोडाइलाइसिस सुरु गरिएकोमा आगामी दिनमा थप मेसिनहरु पनि थपिने जनाइएको छ । मेसिनसहित आवश्यक प्रविधिका लागि जापानबाट झण्डै ६० लाख रुपैयाको लागतमा दुई मेसिन भित्राइएको अस्पतालका डा. बद्री पौडेलले जनाए ।
प्राकृतिक मृगौलाले पूर्णरुपमा काम गर्न नसकेमा उपचारका लागि डाइलाइसिस र मृगौला प्रत्यारोपण दुईवटा विकल्प हुन्छन् । तीमध्ये डाइलाइसिसमध्ये हेमोडाइलाइसिस र पेरिटोनियल हुन् ।
पेरिटानियल पुरानो र त्यत्ति प्रभावकारी नभएकोले हाल हेमोडाइलाइसिस प्रचलनमा छन् । यसमा कृत्रिम मृगौलाको सहायताले फोहोर पानी निकालिन्छ । हप्तामा बढीमा तीन पटक गर्नुपर्ने यो उपचारमा बढीमा चार घण्टा लाग्छ । नियमित डाइलाइसिसका लागि चरकमा दुई हजार पाँच सय रुपैयाँ शुल्क तोकिएको छ ।
प्रस्तावित गण्डकी मेडिकल कलेज टिचिङ हस्पिटल एण्ड रिसर्च सेण्टर प्रालिमा हाल तीन सय शैश्या छन् । तीनवर्षभित्र लेखनाथमा सात सय शैया क्षमताको अस्पताल बनाउने लक्ष्य लिएको यो मेडिकल पश्चिमाञ्चलमै सबैभन्दा ठूलो अस्पतालको रुपमा विकसित हुँदैछ ।

समाजमा थप सामग्री