पूर्वी पाल्पाबासीलाई मोवाइल चलाउन सिजन कुर्नुपर्छ

यज्ञमूर्ति तिमिल्सिना/पाल्पा २१ पुस

सदरमुकाममा मोवाइलकै सञ्चारबाट दैनिक करोडौंको कारोवार भइरहेका बेला पूर्वी पाल्पाका दुई दर्जन गाविसका बासिन्दाले मोवाइलबाट फोन गर्न सिजन कुरेर बस्नुपर्ने बाध्यता छ । प्रस्तावित नगरपालिकाभित्रको रामपुरमा एउटा टावर विग्रनासाथ टेलिफोन सेवा नै पूर्णतया प्रभावित हुने गरेको छ । ल्यान्डलाइन फोनको समस्याका कारण स्थानीय एफएम रेडियो समेत प्रभावित हुने गरेको छ ।
दुरसञ्चार कार्यालय पाल्पाका अनुसार स्याङजाको ग्रहौसरसाग सिधा सम्पर्कमा रहेका मोवाइल बिटिएसहरूले पूर्णतया काम गनगर्ने भएकोले समय समयमा समस्या देखिएको छ । ग्रहौसरको टावरमा विद्युतीय हाई भोल्टेजका कारण रेडियो युनिटले काम गर्न छाडेपछि त्यससाग सम्पर्कित भएका पाल्पा र स्याङजाका १६ वटा बिटिएस टावरले काम गर्न छाडेका छन् । रामपुरको टावरमा पुरानो युनिट जडान गरी सञ्चालनमा ल्याइएको छ ।
सिमकार्डको वितरणमा भएको बृद्धिसंगै ग्रामीणस्तरसम्म पनि मोवाइल सेवा दिन दुरसञ्चार कार्यालयले पछिल्लो समय गाउँ गाउँमा समेत टावर विस्तार क्रमलाई तीव्रता दिएको छ ।
हालसम्म जिल्लामा दुरसञ्चार कार्यालयमा दुई वटा टावरले काम गरिरहेका छन् भने बतासे, आर्यभञ्ज्याङ, गैरागाउँ, हार्थोक, रामपुर, लहरेपिपल, खालीवन, कसेनी, ताहुँ, कोलडाँडा, मस्याममा नमस्ते मोवाइलका टावर सञ्चालित छन् । त्यस्तै बतासे, जन्तीलुङ, आर्यभञ्ज्याङ, खालीवन, छहरा, कोलडाँडा र ख्याहाबाट स्काई मोवाइल प्रयोग कर्ताका लागि सुविधा प्रदान गरिदै आएको छ । नजिक नजिकमै टावर बनाइएको भएपनि बिग्रेपछि बनाउन ढिलाई गर्ने र फोन गर्न हप्तौ कुर्नु पर्ने बाध्यता रहेको पूर्वी पाल्पाबासीको भनाई छ ।
पूर्वी पाल्पामा सञ्चालित टावरको लिंक नुवाकोटका टावरसाग भएकाले नुवाकोटको टावरमा सानो समस्या देखिनासाथ पाल्पाका टावरले समेत काम गर्न नसक्ने नेपाल दुरसञ्चार कार्यालय पाल्पाका सुपरभाइजर रमेश नेपालले जानकारी दिए ।

अर्थ - थप सामग्री