पीएनमा आजदेखि परीक्षा

विजय नेपाल पोखरा, २२ पुस

गत शुक्रबारदेखि स्थगित हुँदै आएको पृथ्वीनारायण क्याम्पस स्नातक तह प्रथम वर्षको परीक्षा आज मध्यान्ह १२ बजेदेखि सुरु हुँदैछ। आजको परीक्षामा नियमित परीक्षा तालिका अनुसार बीएस्सी प्रथम वर्षअन्तर्गत केमेष्ट्री, बीएल र एलएलबी अन्तर्गतका परीक्षार्थीहरु सहभागी हुँदैछन्।
अखिल क्रान्तिकारीले अनेरास्ववियूका विद्यार्थी नेतामाथि गत पुस ४ गते राति आक्रमण गरेपछि दुई अखिलबीच चिसिएको सम्बन्धका कारण परीक्षासमेत प्रभावित बन्दै गएपछि कास्कीका प्रमुख तीन राजनीतिक दलहरुका नेताहरुबीच विभिन्न चरणमा भएका वार्तामा सहमतिपछि आजदेखि परीक्षा सम्भव भएको हो।
यसअघि चार दिनसम्म स्थगित भएको परीक्षाका कारण झण्डै ८ हजार परीक्षार्थीहरु परीक्षा दिनबाट वञ्चित भएका थिए। उनीहरुको परीक्षा नियमित परीक्षा तालिका सकिएपछि पुनः संचालनका लागि परीक्षा बोर्डलाई जानकारी गराइएको क्याम्पस प्रमुख गेहेन्द्रेश्वर कोइरालाले जानकारी दिनुभयो।
सहमति अनुसार अखिल क्रान्तिकारीका इकाई अध्यक्ष गोविन्द केसीसहित ५ विद्यार्थीहरुमाथि काटिएको पक्राउ पूर्जी परीक्षा अवधिभर निक्रिय पारीने र सहमतिको प्रयास जारी नै रहने गरी परीक्षा संचालनको बाटो खुल्ला गरिएको हो।

समाजमा थप सामग्री