जेठ १५ पछि पनि प्रजातन्त्र सुनिश्चित गरः जिम्मी कार्टर

ईकान्तिपुरबाट

काठमाडौं, फाल्गुन २१ -

संयुक्त राज्य अमेरिकाका पूर्व राष्ट्रपति जिम्मी कार्टरले जेठ १५ गते आउन सक्ने कुनै पनि प्रकारको संकटमा प्रजातान्त्रिक प्रकृयाको निरन्तरता सुनिश्चित हुने योजना तयार गर्न आग्रह गरेका छन् ।

२०६७ साल जेठ १४ गते नयाँ संविधान जारी हुनुपर्ने समयसीमा कटेको अवस्थामा आउन सक्ने संकटको आंकलन गर्दै उनले त्यसपछि पनि प्रजातान्त्रिक प्रकृया बिना अवरोध निरन्तरता सुनिश्चितत गर्ने योजना तयार गर्न कार्टरले आग्रह गरेका हुन् । 'नयाँ संविधानको लागि मे २८ (जेठ १४) को समयसीमा द्रुत गतिमा नजिकै आउँदैछ' उनले बिहीबार नेपाली जनताको नाममा एक खुला पत्र लेख्दै भनेका छन्, 'मे २९ (जेठ १५) मा आउन सक्ने कुनै पनि प्रकारको संकटलाई रोक्न प्रजातान्त्रिक प्रक्रियाको बिना कुनै अवरोध निरन्तरता सुनिश्चित गर्न योजना तयार हुनुपर्छ ।'

उनले उच्चस्तरिय राजनीतिक संयन्त्रको निर्माण र नेताहरुबीचको वार्ता प्रयासले आफूलाई उत्साहित बनाएको उल्लेख गरेका छन् । 'माओवादी लडाकुहरुको समायोजन तथा पुनस्र्थापनाका लागि सरकारको भर्खरै प्रस्तावित कार्ययोजना स्वागतयोग्य छ' उनले भनेका छन्, 'म आशा गर्दछु कि दलहरु यस मुद्दामा राजनैतिक सहमतिमा पुग्न सक्षम हुनेछन् ।'

कार्टरले अयोग्य माओवादी लडाकूहरुको जारी बहिर्गमनका लागि सरकार, माओवादी र राष्ट्रसंघलाई धन्यवाद दिएका छन् । उनले संविधानसभाले मननयोग्य प्रगाति गरेकोमा पनि खुशी व्यक्त गरेका छन् ।

सबै पक्षहरुले उत्तेजक आलोचना तथा कार्यहरु रोक्नु पर्ने उल्लेख गर्दै अमेरिकी पूर्व राष्ट्रपति कार्टरले ऐतिहासिक शान्ति प्रक्रियाको मार्गदर्शक दस्तावेजमा समाहित शान्ति, प्रजातन्त्र, न्याय, मानव अधिकार, कानूनको राज्य तथा प्रेस स्वतन्त्रताका सिद्धान्तहरुमा फर्कन आग्रह गरेका छन् । कार्टर सेन्टरका अध्यक्ष उनी संविधानसभा निर्वाचनको पर्यवेक्षण गर्न नेपाल आएका थिए ।

आजका पत्रपत्रिकाबाटमा थप सामग्री