हत्याको विरोधमा चक्काजाम

भद्रपुर, २७ फागुन (दैनिकी)

चालकको हत्याको विरोधमा स्थानीय सुरुङ्गा बजार बिहीबार बिहानैदेखि स्थिति तनावग्रस्त बनेको छ। आक्रोसित यातायात मजदुरहरूले अनिश्चितकालका लागि सार्वजनिक यातायात सेवा ठप्प गरी मृतक चालकको शव पूर्व–पश्चिम महेन्द्र राजमार्गको सुरुङ्गाखण्डमा राखेर नाराबाजी गरिरहेका छन्। बिहेका लागि भाडामा लगिएको मे १ ख १८३५ नम्बरको बसका चालक ३५ वर्षीय शेरबहादुर मगरलाई केही जन्तीले बुधबार साँझ सुरुङ्गामा कुटपिट गरी गंभीररुपमा घाइते बनाएका थिए। घाइते चालकको उपचारको क्रममा मृत्युभएपछि यातायात मजदुरहरू आक्रोशित भएका हुन्।
घैलाडुब्बाबाट बेहुला लिएर मोरङको गोविन्दपुर–१ गइरहेको उक्त गाडीको हुटमा केही युवकहरू बसेका तथा उनीहरूलाई चालकले उत्रन भनेपछि विवाद भएको थियो। विवाद बढ्दै गएपछि हातहालाहाल भएको र ती युवकले चालकलाई मरणासन्न अवस्थ्ाामा पुर्‍याएका प्रहरीले जनाएको छ। चालक हत्याको अभियोगमा प्रहरीले घैलाडुब्बा गाउँ विकास समिति–६ का सजन सिटौला, सोही ठाउँ बस्ने विपिन शर्मा र वडा नं. ७ का डम्बर मिश्रलाई पक्राउ गरेको छ।
यसैबीच, चालकको मृत्युको खबर सुन्ने वित्तिक्कै आक्रोसित स्थानीय यातायात मजदुरहरूले प्रहरी चौकीमा ढुङ्गामुढा तथा आगजनीको प्रयास गरेका थिए। आक्रोसित यातायात मजदुरहरूले मृतक चालकलाई सहिद घोषणा गर्नुपर्ने, दोषीलाई कारबाही गर्नुपर्ने, मृतकका परिवारको पालनपोषण गर्नुपर्ने माग गरेका छन्। ती माग पूरा नभएसम्म सडक अवरुद्ध पारिरहने दृढता उनीहरूले व्यक्त गरेका छन्।

अर्थ - थप सामग्री