चीनमा संवाददाता हुनका लागि नयाँ मापदण्ड

पत्रकारिता क्षेत्रमा प्रवेश गर्न सामाजवादी सिद्धान्त र समाचारबारे मार्क्सको दृष्टिकोण सिक्नुपर्ने

बेइजिङ, २७ फागुन (दैनिकी)

चीनले संवाददाता हुन चाहने व्यक्तिहरुका लागि नयाँ परिचयपत्र दिने व्यवस्था लागू गर्दै उनीहरुले पूरा गर्नु पर्ने मापदण्डलाई कस्सिलो बनाउँदैछ। यो पद्धति मुताबिक हरेक संवाददाताले अरु ज्ञानको अतिरिक्त मार्क्सवादी र कम्युनिस्ट सिद्धान्तहरुसम्बन्धी तालिम लिएको हुनुपर्नेछ। छापाखाना र प्रकाशन विभागका उप महानिर्देशक ली दोङ दोङले चिनियाँ पत्रकारहरुसँग उपयुक्त तालिम नहुँदा चिनियाँ पत्रिकारिताको लोकप्रियता घटेको बताएको साउथ चाइन मर्निङ पोस्टले बिहीबार जनाएको छ। तर तिनले खास दृष्टान्त भने दिएनन्।
पत्रकारहरुका लागि चाहिने नयाँ योग्यताको यो परिपाटीले पत्रकारिता र सञ्चार आचारसंहितालाई समाजवादी र माक्सवादी दर्शनसँग जोड्नुपर्छ भन्ने आवश्यकतालाई सुनिश्चित गर्नेछ। लिलाई उद्धृत गर्दै सिन्ह्वा समाचार संस्थाले भनेको छ— पत्रकारिता क्षेत्रमा प्रवेश गर्न चाहने कमरेडहरुले चिनियाँ विशेषता बोकेका सामाजवादी सिद्धान्त र समाचारबारे मार्क्सको दृष्टिकोण सिक्नुपर्नेछ। यस अतिरिक्त उनीहरुले सञ्चार आचारसंहिता र समाचार एवं सस्ता प्रचारबाजीमा कम्युनिस्ट पार्टीको अनुशासन पनि बुझ्नुपर्नेछ।
कम्युनिस्ट सिद्धान्तको पत्रकारिता कम्युनिस्ट नेतृत्वको सहयोगी बन्नु पर्छ र उनीहरुको सत्प्रयासलाई अवमूल्यन गर्नुहुँदैन भन्छ। धेरैजसो प्रजातान्त्रिक मुलुकहरुमा संवाददाताहरुले सरकारको एक स्वतन्त्र पहरेदार बन्ने मोडललाई अङ्गीकार गर्दैआएका छन्। रासस/एपी

समाज - थप सामग्री