चिकित्सक अभावका कारण बिरामीहरु मारमा

रोहित कुमार मण्डल लहान, २७ फागुन

सिराहा जिल्ला अस्पतालमा चिकित्सकहरुको अभावका कारण सेवाग्राही जनता छिमेकी मुलुक भारतको जयनगर, दरभंगा लगायतका ठाउँमा बिरामी लिएर जान थालेपछि अस्पतालका शैय्या बिरामी विहीन बन्न पुगेको छ। १५ शैय्याको उक्त अस्पतालमा तीन जना चिकित्सकहरुको दरबन्दी रहेपनि अहिलेसम्म १ जना चिकित्सक मात्र कार्यरत रहेको अस्पताल प्रशासनले जनाएको छ। तर उहाँले पनि अधिकांश समय अस्पताल बाहिरै रहन थालेपछि बिरामीहरु उपचार नपाउँदा छाडेपछि उपचारको लागि बिरामीहरु अन्यत्रै जान थालेका हुन्।
सिरहा सदरमुकामसहित ग्रामीण क्षेत्रका बिरामीको चाप रहने उक्त अस्पतालमा दरबन्दी रहेका चिकित्सकहरु अहिलेसम्म हाजिर नभएको बताईन्छ। स्थायी दरबन्दीका चिकित्सकहरु नआएपछि अस्थायी चिकित्सकद्वय नागेन्द्र प्रसाद यादव र विष्णुदेव मण्डलद्वारा बिरामीहरुको उपचार भईरहेको छ। अस्पतालमा कार्यरत अ.हे.व.नरेश यादवले अस्थायी चिकित्सकहरु पनि मन लागेको बेला मात्र आउने गरेकोले बिरामीलाई उपचार गर्न समस्या परेको बताउनुभयो।
बिरामीहरुले उपचार सेवा पाउन त छाडे नै, अस्पताल परिसर पनि दुर्गन्धित हुन थालेपछि आक्कल झुक्कल आउने बिरामीहरु पनि अस्पतालको दुर्गन्धले झन् बिरामी पर्ने गरेको स्थानीय दिलिपकुमार पासवानले बताए। अहिले अस्पताल परिसरमा वर्षाको पानी जमेर फोहोर भएको छ भने नियमित सरसफाईको अभावमा शौचालयहरु समेत फोहोरले दुर्गन्धित भएका छन्।

समाज - थप सामग्री