फोहोर व्यवस्थापन गर्न सरसफाइमा बालबालिका

नवलपरासी, ३ जेठ (दैनिकी)

परासीमा रहेको शान्ति बाल क्लब शान्तिटोलले रामग्राम नगरपालिकाका सबै टोलमा सफाइ अभियान चलाएको छ। नगरपालिकालगायत सरोकारवालाले नगरको फोहोर व्यवस्थापन नगरेपछि यहाँका बालबालिका स्वयम् सरससफाइमा जुटेका हुन्। लोकतान्त्रिक चोकदेखि शान्तिमार्ग हुँदै रामखण्डा खोलासम्मको सडक वरिपरिको क्षेत्रमा बालबालिकाले सरसफाइ गरेका छन्। फोहोरको व्यवस्थापन नहुँदा नगरभित्र दुर्गन्ध फैलिई गर्मीको समयमा विद्यालय जाँदा आउँदासमेत मुख छोप्नुपरेकाले हप्ताको एक पटक नगर सरसफाइमा लाग्ने गरेको बाल क्लबकी सल्लाहकार सुमित्रा आलेले बताउनुभयो।
जिल्ला बाल कल्याण समितिका विष्णु लामिछानेले नगर सरसफाइमा जुटेका बालबालिकाबाट समाजले पाठ सिक्नुपर्ने बताउनुभयो। अभिभावकले प्रोत्साहन गर्ने हो भने बालबालिकाहरु आफ्नो अध्ययनबाहेक सामाजिक कार्यमा पनि अघि बढ्नसक्ने क्लबकी अध्यक्ष सीता विश्वकर्माले बताउनुभयो ।
बालबालिकाले नगर सरसफाइ गरेको सबै जना हेर्न आए तर कसैले हामी पनि सरसफाइ गर्छौं भनेनन् शान्ति बाल क्लबकी अध्यक्ष बिकले भन्नुभयो।

बाल बगैंचा‏ - थप सामग्री