धेरैलाई मूर्ख बनाएको लिग

हिमेशरत्न वज्राचार्य, कान्तिपुरबाट

काठमाडौ, आषाढ ८

क्रिकेटलाई लिएर भन्ने गरिन्छ, खेल्ने मूर्ख र हेर्ने महामूर्ख । यो प्रसंग धेरै अर्थमा हालैमात्र टुंगिएको सहिद स्मारक लिग 'ए' डिभिजन फुटबललाई लिएर मिल्छ । यसपल्टको लिग खेल्ने केही खेलाडी, अधिकांश क्लब पदाधिकारी र प्रशिक्षकले प्रतियोगिताको खुबै मज्जा लिए, धूर्त हुँदै ।

बाँकी नेपाली फुटबल पारखी, दशरथ रंगशालामा देखिने आमदर्शक र प्रायोजक भने मूर्ख सावित भए । यसपल्टको लिगका अधिकांश खेल नतिजा हाकाहाकी पहिले नै तय थियो । नतिजाको निर्णय मैदान बाहिर गरियो, खेलाडीले मैदानमा गएर अभिनय मात्र गरे ।

लिगको समाप्तिमा नेपाली फुटबलसँग आबद्ध कोही पनि खुसी हुन सकेनन् । लिगको समाप्तिमा देखिने युद्ध जिते जस्तो बहादुरी कसैमा देखिएन । बरु सबै युद्धमा हारेका योद्धा जस्तै थिए । फुटबललाई माया गर्नेका लागि यो खेलमात्र होइन, अरू धेरै थोक हो ।

फुटबलसँग प्रत्येकको साइनो फरक हुनसक्छ । यसपल्टको लिगमा धेरैले यो साइनोको हत्या गर्ने प्रयास गरे । त्यसो त नेपाली लिग फुटबलमा धेरै अगाडिदेखि मिलेमतो हुने गरेको सबै मान्छन् । यसपल्टको लिगमा यो खुलेरै भयो । एकपछि अर्को नाटकीय नतिजा आए ।

पोस्ट म्याच कन्फ्रेन्समा कतिपय प्रशिक्षक र व्यवस्थापकले आफूले फलानो खेल छाडेको अथवा फलानो खेल हात पारेको दाबी पनि गरे । नेपाली फुटबलको सर्वोच्च संस्था एन्फाले अप्रत्यक्ष रूपमा मिलेमतो स्वीकारे पनि प्रत्यक्ष रूपमा प्रमाण नपुगेको लाचारी देखाइरहेको छ ।

कुष्ठरोगलाई उपचार गर्नुको साटो त्यसलाई लुकाएर राखे अंगभंग होइन्छ । खेल मिलेमतो पनि कुष्ठरोगजस्तै भएको छ, यसको उपचार भएन भने नेपाली फुटबल नै अंगभंग हुन बेर छैन । यसलाई लुकाएर निको हुन्न, उपचार आवश्यक छ ।

अहिलेसम्म हाम्रो फुटबल उँभो नलाग्नुको कारण खेल मिलेमतो जस्तो गम्भीर विषयलाई पनि हाँसोमा उडाउन सक्ने नेपाली क्षमता हो । गणेश थापाले एन्फा अध्यक्ष सम्हालेयता अहिलेसम्म दुई गम्भीर समस्याको सामना गरेका छन्, दुवैपल्ट विरोधीको समानान्तर फुटबल संघ चल्नु ।

यसपल्टको लिगमा देखिएको मिलेमतो त्योभन्दा पनि गम्भीर समस्या हो । खेल मिलेमतोले नेपाली फुटबल धराशायी हुँदैछ । मिलेमतोमा पल्केका खेलाडी र पदाधिकारीले आखिरमा नेपाली फुटबलका लागि कत्तिको गतिलो योगदान दिन सक्छन् ? उनीहरूका लागि नेपाली फुटबल क्षणिक मनोरञ्जन भइरहेको छ ।

एन्फासामु गम्भीर समस्या तेर्सिएको छ र तत्काल अपि्रय देखिन सक्ने निर्णयसमेत आवश्यक छ । अन्यथा अहिलेको जस्तो लिग हुनुभन्दा नहुनु राम्रो । खेल मिलेमतो नेपाली फुटबलमा देखिएको क्यान्सर हो, यसको उपचारका लागि रोग प्रभावित अंग काट्न पनि पछाडि पर्नुहुन्न ।

आजका पत्रपत्रिकाबाट - थप सामग्री