हाइब्रिड पिसी र टचस्क्रिन ई–टप

प्रविधिमा आएको विकासले पर्सनल कम्प्युटर ल्यापटपजस्तै बनेका छन्। वजनका हिसाबले हलुङ्गा, दूरीका हिसाबले निकट र सुन्दरताको हिसाबले ´स्लिम´। ´यसमा त सीपीयूसमेत छैन,´ हाईब्रिड पिसी हेर्नेको भिडबाट एक जिज्ञासुले प्वाक्क बोले। हाइब्रिड पिसीका आधिकारिक बिक्रेता इन्टरनेसनल इलेक्ट्रोनिक्स कन्सर्न पुतलीसडकका प्रज्वल अमात्य भने जिज्ञासुको नजर किबोर्ड र माउसतिर डोर्‍याइरहेका थिए। ताररहित माउस र किबोर्ड हातले उठाउँदै प्रज्वलले भने, ´ल हेर्नोस्, यसको माउस र किबोर्ड दुवै वायरलेस (ताररहित) छन्।´ पर्सनल कम्प्युटरलाई मानिसको कोठामा प्रवेश गर्न त्यति लामो समय लागेन, जति यसले ओच्छ्यानसम्म पहुँच बनाउन लियो। ´हाइब्रिड पिसीलाई बेडमा बसेर ल्यापटपझैं चलाउन सकिन्छ,´ नयाँ प्रविधिको उपयोगिता र सहजता खोल्दै उज्वलले भने। १२ फिटसम्मको दूरीबाट तारबिनाका किबोर्ड र माउसले यो कम्प्युटर सजिलै चलाउन सकिन्छ। हाइब्रिड पिसी विकास भएको धेरै भएको छैन। चार वर्ष उमेर पुगेको हाइब्रिड पिसी नेपाली बजारमा छिरेको भने दुई महिनामात्र भयो। ´हेर्नेमात्र छन्, अहिलेसम्म कसैले किनेको छैन´, उज्वलले भने– ´नयाँ प्रविधि भएकाले जान्न खोज्ने धेरै आउँछन्, प्रश्न सोध्छन्, अनि त्यसै फर्कन्छन्।´ नेपालमा हाइब्रिड पिसीका दुईथरी मोडल उपलब्ध छन् : एनईसी पी ६००० र एनईसी पी ४०१०। अघिल्लोको मूल्य ९५ हजार ९ सय रुपैयाँ छ भने पछिल्लो १ लाख १६ हजार रुपैयाँ पर्छ। हाइब्रिड पिसीमा सीपीयू मनिटरमै जडान (इनबिल्ट) गरिएको छ। एलसीडी मनिटरमा सीपीयूसमेत जडान गरिएकाले यसको आकार, वजन र प्रयोजन ल्यापटपसँग मिल्दोजुल्दो छ। ´कम्प्युटर सौखिनलाई लक्ष्य गरी यो पिसी बनाइएको हो´, उज्वलले भने, ´ग्राफिक्स डिजाइनरका लागि यो बढी उपयोगी छ।´ औंलाले छोएर चल्ने ई–टप तपाईले एप्पलको आईफोन त देख्नुभएको होला। याज्असको टचस्त्रि्कन प्रविधियुक्त कम्प्युटर ´ई–टप´ पनि त्यस्तै छ। नेपाल इन्टरनेसनल बिजनेसले हालैमात्र बजारमा ल्याएको यो केही दिनमै ६ वटा बुक भइसकेको कम्पनीले जनायो। ताररहित माउस र किबोर्डको यो कम्प्युटर स्क्रिनमा औंलाले छोएर चलाउन सकिन्छ, आईफोनजस्तै। तपाईले आफूलाई चाहिएमात्र किबोर्ड र माउस जोडे हुन्छ, नभए यो त्यसै चलाउन सकिन्छ। हाइब्रिड र ई–टप कम्प्युटर हेर्दा उस्तै छन्। ई–टपमा पनि छुट्टै सीपीयू छैन। एलसिडी मनिटरमै सीपीयू जडान गरिएको छ। यसमा सबै काम स्क्रिनमा पेन टच वा औंलाले छोएर चलाउन सकिन्छ। ´कस्तो किबोर्ड नै नभएको ल्यापटप रहेछ,´ सुरुमा ई–टप नियाल्ने व्यक्तिको उद्गार स्मरण गर्दै इन्टरनेसनल बिजनेसका सुपर श्रेष्ठले भने– ´यो ल्यापटप होइन, टचस्क्रिन कम्प्युटर हो भनी हामीले बुझाउनुपर्छ।´ हाइब्रिड पिसी एनईसी पी ४०१० प्रविधि : ताररहित (माउस र किबोर्ड) हार्ड डिस्क : ५०० जीबी मेमोरी : २ जीबी प्रोसेसर : २.५३ गिगाहर्ज (इन्टेल) विशेषता : उच्च ग्राफिक्स, प्रोटेबल मनिटर : १९ इञ्च मूल्य : रु. १,१६,००० याजअस् ई–टप प्रविधि : टचस्क्रिन हार्ड डिस्क : १६० जीबी मेमोरी : १ जीबी प्रोसेसर : १.६ गिगाहर्ज (इन्टेल) क्यामरा : १.३ मेगा पिक्सल विशेषता : वाईफाई, प्रोटेबल मनिटर : १७ इञ्च मुल्य : रु. ८४,०००

प्रबिधि - थप सामग्री